Pobl Ifanc yn Rhoi Adborth Gwych i Lyfrgelloedd Awen

Mae pobl ifanc ar draws Bwrdeistref Sirol Pen-y-bont ar Ogwr wedi graddio eu llyfrgelloedd lleol yn hynod gadarnhaol, yn ôl yr arolwg plant diweddaraf a gynhaliwyd gan Awen, gan dynnu sylw at y rôl hanfodol y mae llyfrgelloedd yn ei chwarae wrth gefnogi darllen, lles a chysylltiad cymunedol.

Fe raddiodd 98% o’r ymatebwyr, 7-12 oed, eu llyfrgell leol yn “dda iawn” neu’n “ragorol”, gan ddangos effaith gref gwasanaethau llyfrgell ar draws y fwrdeistref sirol. Disgrifiodd y bobl ifanc y llyfrgelloedd fel “lle hapus”, yn “hwyl” ac yn rhywle lle maent yn teimlo’n ddiogel, gan adlewyrchu eu pwysigrwydd y tu hwnt i ddarparu llyfrau yn draddodiadol.

Soniodd sylwadau eraill am y cyfleoedd darllen, yr amgylchedd tawel a chroesawgar, yr ystod eang o ddigwyddiadau, gweithgareddau ac adnoddau sydd ar gael, a chyfleusterau fel cyfrifiaduron, clybiau Lego a mannau chwarae. Roedd llawer yn cydnabod staff cyfeillgar a gwegar y llyfrgelloedd.

Rhoddodd y bobl ifanc wybod am welliannau yn eu hyder darllen, cyfleoedd i gymdeithasu â ffrindiau, a mynediad at weithgareddau ac adnoddau am ddim. Mae'r data hefyd yn dangos ymgysylltiad cryf â gwasanaethau llyfrgell craidd, gyda dros 75% o blant yn benthyg llyfrau, tra bod bron i 70% yn mynychu digwyddiadau fel amser stori a sesiynau crefft.

Mae ymatebion yr arolwg yn dangos sut mae llyfrgelloedd yn parhau i chwarae rôl hanfodol ym mywydau plant trwy gefnogi addysg, gwella lles a darparu mannau cynhwysol i deuluoedd a phobl ifanc. Diolch yn fawr i holl staff llyfrgell Awen sy'n gwneud i hyn ddigwydd bob dydd.